नारदाची कळ-३
३-जी चे जी जी र जी जी !

नेक्स्ट जनरेशन तंत्रज्ञान म्हणजे जी, प्रथम होते २-जी, आणि आता आले आहे ३-जी ! सरकारची अपेक्षा होती तीस हजार कोटीच्या आसपास. लिलावात मिळाले ६७ हजार कोटी !

एवढे पैसे मिळवून देणारे हे मोबाईलचे तंत्रज्ञान देईल इंटरनेट, टी.व्ही., कॉन्फरन्स व्हिडीओ कॉल्स, वगैरे. त्यासाठी हॅंडसेटस वेगळे (महागडे , १६/१७ हजाराचे ) लागतील. आता लोक विचारताहेत की एव्हढे महागडे तंत्रज्ञान आपल्याला परवडणार आहे का ? आणि हे विचारणारे आपले लोक आधीच मर्सीडीज, बीएमडब्ल्यू , ऑडी अशा प्रचंड महागड्या गाड्या घेऊन बसले आहेत.
हे आहे प्रचंड किंमतीच्या भूखंडांसारखे ! बिल्डरांना जसे कितीही महागडा प्लॉट परवडतोच ( कारण त्यावर फ्लॅटस् बांधून ते आपल्याकडनंच पैसे घेणार असतात ). कितीही किंमत कशी परवडते ? कारण कारपेट, बिल्ट अप, सुपर बिल्ट अप, असा घोळ कोणी मोजत बसत नाही . तसेच असते मोबाईलचे !

जी कंपनी मोबाईलचे बिलिंग करते त्यांना ते कोष्टकच लिहून देतात की १ मिनिट म्हणजे ४३ सेकंद ! आणि आता तर त्यांनी आपल्या गळी दर सेकंदा वर बिलिंग करण्याचे उतरवले आहे. आता आपण आपला सेकंद व त्यांचा सेकंद पडताळून पाहणार आहोत का ? व कसे ?

तुम्हाला हे कपोल कल्पित वाटत असेल तर इंटरनेट सेवा पुरवणार्‍या एम् टी एन एल च्या बिलिंग सेवेला भेट द्या. ते म्हणतात तुम्ही नुसते साइटवर गेलात तरी ते "डाऊन लोड" धरल्या जाते, अनलिमिटेड डाऊनलोड म्हणजे केंव्हांही डाऊनलोड, असे सर्रास लूटमारीचे कोष्टक ! असेच आहे टोल चे ! किती टोल वसूल झाला व किती खर्च झाला होता ह्याचा हिशोबच नसतो. आपण तर ते विचारीतही नाही. म्हणूनच तर नुसतेच भरभक्कम लिलाव नाही तर "राजा" ला भरपूर मलिदा देणेही परवडते. कारण ते परवडणे आपणच आपल्या खिशातून भरत असणार असतो !

-----अरुण अनंत भालेराव
९३२४६८२७९२
arunbhalerao67@gmail.com

नारदाची कळ : २
क्लीन चीट !
आजकाल सगळेच राजकारणी खेळ-क्षेत्रात का आहेत ?
हे सगळे विश्व म्हणजे एक ब्रह्मचैतन्य आहे. आणि चैतन्याचा पाया आहे, क्रीडा. म्हणून ज्यांना चैतन्यमय राहायचे आहे त्यांना कुठलाना कुठला खेळ आवश्यक आहे. अगदी स्वत:च खेळले पाहिजे असे नाही. सहभाग आणि स्वाहम केले तरी चालते. शिवाय नाही तरी राजकारण खेळापासून फार वेगळे नाहीय. जसे: क्रिकेट हा खेळ तर राजकारण हा पोरखेळ !
साहेबांनी मोदींना ( दोन्ही मोदी ) क्लीन चिट का दिली ?
हे काय विचारणे झाले ! फारच बुवा तुमचे अज्ञान ! साहेब स्वत:च नाही का क्लीन चीट !
----कळलाव्या

नारदाची कळ
भारतीय वृत्तपत्रे भाषा नीट छापण्याच्या कामात फारच चुका करतात. आता हेच पहा ना ! बिचारे शशी थरूर . यूनो च्या सेक्रेटरी पदासाठी निवडणूक लढलेला हा थोर माणूस.( आता निवडून नाही आला हे यूनोचे कमनशीब.). त्याच्या तिसर्‍या मैत्रिणी संबंधी सगळे पत्रकार खार खाऊन आहेत. सानिया सारख्या एका सुंदर मुलीचे लग्न होते न होते तोच आता ही कोण सुनंदा पुष्कर आहे तीही लग्न करते आहे. सुंदर मुलींचे कितवे लग्न हा कधी प्रश्नच नसतो. वाईट असते ते त्यांना इतरांनी फितविणे. ह्याच जेलसी-न्यायाने ही घटनाच भारतीय पुरुषांना डिप्रेशन आणणारी. त्यात भारतीय पत्रकारांनी इतकी ढोबळ चूक करावी ! ही सुनंदा पुष्कर आता शशी थरूर ह्यांची मैत्रीण आहे व ते तिसरे लग्न करणार आहेत हे किती चूक आहे. पुष्कर मैत्रिण नसून खर्‍या बातमीत "पुष्कळ मैत्रिणी आहेत" अशी ओळ होती. त्याची मुद्रणात चूक करीत सुनंदा पुष्कर ही एकच मैत्रीण आहे हा समज पसरविणे हे थरूर साहेबांचे बदनामी करणारेच आहे. आता ते नक्कीच अब्रू-नुकसानीचा दावा ठोकणार पत्रकारांवर. रहा आता तयार किंवा माफीनामा छापा की खूप सुंदर मैत्रिणी आहेत थरूर साहेबांना !
-------कळलाव्या